Gone to Mac hat geschrieben:Komisch, in SG sölle Geisterspiel Fr. 60k und bi uns 300k koste, also 5x weniger? Klar isch s Stadion kleiner aber trotzdem... Äntwäder verzellt dr BB eifach e Stuss oder d Köste in BS stön in keim Verhältnis
Q:
https://www.20min.ch/story/hueppi-und-s ... 9030082817
Dass Köschte bi uns in keim Verhältnis stöhn, druff dien jo einige scho sit Johre hiwise. Nume gwichtet me halt kurzfrischtige sportliche Erfolg sit jehär höcher als e gsunde Verein. Wenn me bishär druff higwise het, denn isch me teils jo sogar usglache worde. Erscht jetzt in dr Krise, mache sich die meischte mol biz gedangge. Und au do goht dr Gedangge nur in d richtig "wieso mien mir spare" "wieso het dr Bernie 2 so viel Gäld usekeit" - d Wurzle vo de Problem wärde leider immer noni gross betrachtet. Unseri erfolgrichschte Zyte, so schön wie sie gsi sin, hän dr FCB zumene rise Monschter gmacht. Wo für mi in dr Tat in keim Verhältnis stoht zur dr kleine Liga womer Schutte.
Bi uns kasch schomol eifach rächne: Ungfähri Monetsmieti fürs Joggeli sin 300'000 Stutz. Gönn mr mol vo 2 Geisterspil pro Monet us, sin das pro Geischterspil schomol 150'000 Franke nume Miete für die Hütte. Dr Räscht kame sich denn drzue rächne (i nim ah do kömme no Uffwänd für busnderi Gsundheitsmassnahme, Sicherheitskräft, Strom, Wasser, sunschtigi Uffwänd, Mitarbeiter wo im mim Verständnis nüm in Kurzarbeit wäre, etc).
Und wenn me denn bedänggt, dass mr e "günschtigi" Miete hän - die also nid im Marktwärt vo dr Hütte entspricht sondern vo dr Politik so gwünscht isch, dass dr FCB quasi e Fründschaftspris bekunnt... denn weiss me bescheid womer uns bewege. I weiss zB nid, wie d Miete in St.Galle greglet isch - wenn sie nur's Stadion für e Match miete isches notürlich vil günschtiger. Drfür hän si halt nit die volle Vermarktigsrächt. Ob das bi uns wirklich e Erfolgsgschicht gsi isch mit de Vermarktigsrächt wag ich übrigens au z bezwifle, verantwortlich drfür isch jo e gwüsse Blaser gsi. Und däm sini Ifäll sin jetzt au nid grad wirklich dr Brüller gsi.
