Sone Umfrog zerstelle noch somene desaströse Match isch villicht au nid grad optimal
Trotzdäm muessi sage das au jetzt, 1 Nacht spöter, dAntwort die gliichi bliibt: Nei es isch nüm tragbar.
Sorry aber lueget euch doch mol nur scho dr Burgener ah. Klar, me söll niemr nochm üssere beurteile, aber in sinere Position het me eifach e gwüssi usstrahlig zha, Punkt!
Dä Typ hockt an dene Prässekonferänze und es seht uus, als würd er demnöchst in sich sälber zämebräche. Ich spür kei Liideschaft, kei Begeisterig und kei Uufträtte, wo emene Präsidänt würdig wär – und do fangts doch scho ah, dass zieht sich vom oberste Kopf 1x durch dr ganzi Verein bis zu de Spiiler!
Ich nimm ihm das aber au garnid unbedingt übel – er isch eifach nid dr Typ drfür ! Nur muessi mi froge wie er denn überhaupt in die Position koo isch. Am Ahfang het’s mol gheisse vo ihm wirdme nüt höre und er sigi nur im Hintergrund, will’s aber dermasse knallt im Verein, het er wohl sGfühl das er doch stellig nä muess - nur taugt er dodrzue einach nüt.
Dr Streller isch als Legände abträtte und ich mag sini Art & Wiis eifach zRede ohne sich vorhär 3x züberlegge öb das jetzt so ganz «politisch korräkt» isch. Trotzdem muessme au do sage: Wie kunntme drzue eine wo grad sini aktivi Karriere beändet het, als Sportchef zmontiere? Ganz ehrlich: Do fangsch mol bi Aarau oder Winterthur ah – aber nid diräkt vo Null uuf 100 zum FCB!
Zgueterletzt: und was het eig. dr Alex Frei in däm «Führigsstab» zsueche?
Zum Schluss no dMannschaft und so hart wie’s isch, aber die Qualität längt eifach garnid für mehr, do git’s au garnüt schönzrede. Um mol Name znenne: Abgseh vom Omlin und Serey Die seh ich dört nid 1 Spiiler wo bsunders usestäche würd und wo ich mir vorstelle könnt, dass däjenigi mol für viil Gäld wiitrverkauft würd wärde.
dFehler händ doch scho Ahgfange wome lüüt wie em Delgado no Fründschaftsverträg gä het, sorry aber what the fuck?
Ich seh bis hüt nid dr Fehler bim Trainer und glaub au nid, dass dr Wicky dr Grund für das alles gsii isch, sondern lediglich dr Sündebock.
Es isch e Mannschaft ohni Härz, me het nid richtig ahnegluegt und nid richtig analysiert, was genau benötigt wird und drzue ahne het me falsch investiert. Ich weiss das Thema isch usglutscht aber zum’s abzrunde: 5 Millione füre Rächtsverteidiger? Sorry aber das dörf doch nid woor sii….Hüt isch dr letzti Tag wo's Transferfänster offe isch und dort wird wohl au nüt mehr goo, wozue au, nidmol europäisch spiiltme. Wenn in däm Kader aber nüt mehr goht, wirdme au die Saison uuf Rang 2 beände.
Im nochhinein isch mr au immer klüger, isch jo klar und au ich ha nochm Führigswächsel au ghofft, das es funktioniert, machts aber ganz eifach nid.
Jetzt muessme däre Amateurführig ändlich e ändi setze.
:)
