MrFreezy hat geschrieben: ↑13.10.2023, 20:58 Aktuell zum 130 Joor Jubiläum gits jede Daag e tolli Gschicht us dr FC Basel Welt:
https://130joor.ch/loos-emol
Vieli tolli Erinnerige drunter
Us miner Sicht het das e eigene Thread vrdient.
Bis am 15.11.2023 gitts divärses organisiert zum s'130jöörige Bestehe vom FCB zfiire, das hen vrmuettligg alli scho mitbikoh. Obs Schutte, Quizze odr Bekenne isch, shet für alli öbbis drbi.
Mi mit Abstand grösschts Highlight isch abr d'Sektion "Loos emol":
Mir alli hänn unseri eigene Erläbnis mit em FCB. Ab em 06. Oktober bis zum Geburtsdaag, am 15. Novämber, wärde uff däm Kanal und uff Spotify 100 persönligi Erzählige vröffentligt.
Z Fuess über Balsthal uff Niederbipp bis an Cupfinal. Asado mit Delgados in Buenos Aires und was es mit em Parkplatz in Schönbiehl uff sich het. Worum dr Aleksandar Dragović noch em Double 2012 vom Bundesrot in Bärn empfange worde isch und wie dr Peter Knäbel vom erschte Träffe mit em Yann Sommer vrzellt. Find use, was dr FC Basel sit 1893 für Gschichte schribt und loos dri in 130 Joor FCB.
So grossartig und beriehrend all die Gschichte zghöre, die guet-ändende positive wie au di schwirige, die vo alte Ziite und di aktuellere, vo aktiv am Fuessballgschehe beteiligte und vo passive BegleiterInne.
Eifach nur toll, viile Dangg allne wo ihre Tel drzue biitreit hen und insbesondere au dene, wo das initiert hen. Ihr sin gwaltig. Merci!
Au wemmer kei FCB-Fan odr nit emol Basler isch odr mit Basel ztue het, es lohnt sich eifach 100% dötte mitzloose. Bessr als jede Podcast.
