Joker59 hat geschrieben:
Tam Tam
jo aber dämfall nit vom 2012, wie's bewyyst:
QUOTE Tam Tam 2012
Gueten Oobe zämme, sin iir alli do?
zem Schnitzelbängg go singe, sin mir do iine koo
wie jedes Joor – iir kenned s scho – isch s bi uns Brogramm
mr singe zämme nonem Värs Tam Taram Tam Tam
Tam Taram Tam Tam Tam Tam Tam Taram Tam Tam
Es glätteret ain uf d Glaara-Kirche und git deert nimmi Rue
dausig Lyt sin mega gspannt und luege gfesslet zue
y bi verzwiiflet - was sell y mache, froogt dä armi Maa
die ainzig Schansse fir e Piero, z Baasel e Uffdritt z ha
Im diefe Wald im Appizäll sait e Haas zem andere
äntlig isch s verbotte do - das fuudiblutt go wandere
mini Kind hänn Alpdraim, wache uff - das duet im Härze wee
und schreye luut, Mamme, Mamme, y ha dr Minu gsee
D Joggelihalle muesch ganz ney baue - nit ebbe renoviere
wotsch d Laischtige vo unserem Rotschi wirgglig honoriere
bim FCB isch es au e soo - doch daas het no Zyt
und d Leesig fir dr EHC - do längt scho Dynamit
Im Nooche Oschte isch me fascht ai Härz und ai Seel
si dyschle dausig Paläschtinänser geege ain vo Israel
das Syschtem isch genial fir d Schwiiz - rächne si kurz noo
vom Schwoobeland sind 60 Affe zrugg in Zolli koo
Kerperwälte - nid ganz aifach - wie sell me daas beschriibe?
s git Ainzelni - und au zwai zämme, wo s mitenander …
gruust sii daas? Sind sii dr Mainig, das ganzi isch doch gschteert
geen si uff Itaalie - bunga bunga haisst das deert
Dr Titaanwurz bruucht siibzää Joor, denn bliet er ai Daag uff
bi minere Frau isch daas änlig - maischtens isch die muff
im Gaarte schmeggt s no altem Flaisch und stoosch bim Zaale a
e Tipp: bim Goop in dr Metzgerei kasch s glyyche gratis ha
D Carla Bruni isch am Gebääre, s Kind isch fascht scho do
dr Alt luegt zue, doch bletzlig sait er, Chérie, ych muess jetzt go
ha laider e Sitzig wäg däm Euro - mit dr Merggel goot das Stunde
kuum het s Buschi dä Namme gheert, isch es wiider verschwunde
Dr Leerer ergläärt mit dr Seggsboggs in dr vierte Brimmeli
de Kinder, wo begaischteret sind, daas do und au s Pimmeli
nur dr Hansli basst nit uff, glangwiilt het er dänggt
dä Saich het mir mi Getti scho uff e viert Geburtsdaag gschänggt
Im Bewärbigsgschpröch sait dr Kapitän Pit van Kan-nit-Stüren
die Mittlere Bruche war zu tief - ich kam nicht undendüren
das kaa bassiere - sait sy Scheff und het yym e Schansse gää
jetzt faart er Drämmli z Minchestai uff dr Linie zää
Die Bombe z Kooblänz - Gott sei Dangg isch die nit eggsbloodiert
zem Entscheerfe - mr luege zue - wird d Stadt ewagguiert
do froogt ys ain vom ZDF, warum wir zwei hier stehn
soone Ryysefleechi ooni Schwoobe - aifach wunderscheen
Drey Highlight git s fir ys Baasler - drey woori Fuessballdraim
s Usswärtsspiil in Manchester und denn dä Matsch dehaim
au s Video GC - FCZ kasch zää Mool dääglig gniesse
was git s scheeners, als wenn Ziircher uff Ziircher Faggle schiesse?
E Schissirolle, e alte Karton und Zäpfe vo schlächtem Wy
e roschtigi Schäär, e Liim, wo stinggt, e Schnuer hilft au drbii
falte, glääbe - s macht riisig Spass - und koschtet fascht kai Gäld
fertig isch dr neyi Flieger fir die bescht Armee uff dr Wält
In London ka e UBS-Bängger alli iiberlischte
zwai Milliarde - aifach wägg - jetzt hoggt er in dr Kischte
dr Wältregghord im Stutz versängge het ain in unserem Land
dä kauft so Fluugi fir vier Milliarde und lauft no frey ummenand
D SVP wott Sproochtescht ha mit Niwoo Bee zwoo
bisch gscheit, bisch bleed - verstoosch oder nit? - hesch A1, muesch goo
vo Gänf bis Kuur sottsch alli teschte - erscht daas erfillt dr Zwägg
so het die halbi SVP dr Schwiizer Bass ewägg
D Supperliig isch interessant dangg Gsamaggs und au Sitte
drzue no d Froog: wird YB wiider Zwaite oder Dritte?
isch d Maischterfiir scho im Abbril? Und jetzt dr greeschti Hit
dr Hakan, wo e Interwiu uff italiänisch git
So, das wär s fir hitte gsi vo unserem Schnitzelbangg
hoffedlig hän iir Fraid dra gha, mr saage härzlig Dangg
wyyterhii e scheene Oobe und e tolls Brogramm
mached s guet bis zem näggschte Mool – Eyri zwai Tam Tam
UNQUOTE Tam Tam2012
