Laufi hat geschrieben:Ok ok, ich (und de Brummler) hän's offesichtlich falsch verstande, mea culpa! Het öbber no e Link, wo meh d'PK nomol in Rueh ahluege kah? I will's nomol höre, was und wo ich's falsch verstande ha
Aber ändert eigentlich nüd an minere Meinig, dass meh als Lohnempfänger vom FCB nid eso über e FCB-Gegner schwärme kah (verletzte Fan-Stolz, ich gib's zue!)! Den hät meh wirklich miesste de Vertrag per sofort ufflöse, denn wenn er jetzt wirklich nomol im FCB-Dress würd ufflaufe, wär er eifach unglaubwürdig für mich,
egal ob er e gueti oder e schlächti Leischtig bringt!
Klar würd ich mi freue, wenn er uns gege Tottenham wiiterschiesse würd, kei Froog und dene...Adieu und Tschüss
!! Es isch und bliebt e dummi Situation, wo er uns allene (usser de Luzärner) hät könne erspare und den easy im Summer e Job g'suecht hät!
Jänu...bi enttüscht, Punkt
Zur Erinnerig, lang lang isch's här http://www.telebasel.ch/de/tv-archiv/&id=366814022
Genau das isch es doch, und isch das wo mir eso verdammt viel Mieh macht. Es isch jo nit eso, dass me grad völlig in Undankbarkeit verfallt (ich ha mi scho imene andere Post bedanggt und em AF alles Gueti gwunsche - und das han i ehrlig gmeint).
Aber wenn alli Wort nach guet drei Monet plötzlig z' Null und z' Nüt göhnd, find ich das halt scho sehr froglig - bi allem Reschpäkt.
Und dä mit em Interässe-Konflikt am 1. April find ich persönlig, äxgüsi, lächerlig. Ich dängg do drby an Res Ambühl vom ZSC, wo in de letschte beide Spiel vom Playoff-Viertelfinal wäsentlig drzue bydreit hett, dass dr HCD sich hett miesse uss em Meischterrenne verabschiede. Und dr HCD isch notabene in dr näggschte Saison dr Verein vo däm Urbündner Ambühl. Und kei Sau hett au numme ei Silbe vo Interässe-Konflikt uusegloo. Also höret doch bitte uff mit däre Phrasedröscherey.
Dä Vertrag mit em FCL isch schynbaar scho lenger unterschriebe gsi. Das isch au legitim, wenn me drvo ussgoht, dass s' Adrittsdatum uff e 1. Juli feschtgleggt worde isch.
Dr AF hett zuedäm am Sunntig Nommidaag gwüsst, dass är dringendscht mit em B. Heusler rede muess, wenn är uss em bestehende Vertrag mit em FCB vorzyttig will usstyge. Und in däre sicher nit eifache, jo schwierige Situation paggt dr AF dr Ball zum e Penalty schiesse und - verschiesst en. Dass er dä Elfer versieblet wirf ich im AF nit explizit vor. Vorwärfe due ich ihm, dass är halt ums Verregge no e Gool hett welle schiesse - är hett jo miesse drmit rächne, dass das evt. sy letschts Spiel isch (siehe Rundum-Wingge bi dr Usswäggslig). Und das isch schlicht und ergryffend unprofessionell und alles anderi als mannschaftsdienlig. E Ma wie e AF mit däre exorbitant grosse Erfahrig, wo immer seit dass är sehr guet uff sy Körper und d' Psyche chönn loose, miesst doch die gringschte Zwyfel an sich und die kleinschti Unsicherheit mergge. Es isch jo gopferdoori numme menschlig, wenn öbber in däre Situation sich nit so guet fühlt wie sunscht - aber zuegäh miesst mes chönne.
My Meinig hett kei polemische Ursprung, es sind eifach e baar Fakte, wo ich so empfind wie ich das g' üsseret ha.
Ich bi sehr gspanne uff dr 14. April gege Ziiri.
:)
