FCB-Forum

vor 2 std isch die niederschmätterndi diagnose inecho.

kennt öbber öbber, wo die glichi chrankheit het und wie isch do der verlauf ? sorry, goht mer sälber im momänt nid guet gsundheitlich wäg mim chronic fatigue syndrom, woni grad ä nid wahnsinnig gueti phase ha, ha jetzt nid d energie und bi nid in der verfassig, do lang recherche z betribe.

wär also froh, wenn das öbber chönnt churz beschribe, wie lang das goht, bis sich 1. liechti veränderige bemerkbar mache, wie lang bis es schwerwiegend wird etc.

messi im vorus. wenn öbber nid öfentlich brichte will, pn goht au.

http://www.alz.ch/d/html/

Der Verlauf der Krankheit unterscheidet sich von Fall zu Fall. Das Alter, die Lebensumstände und der gesundheitliche Allgemeinzustand spielen eine grosse Rolle...

Kunnt meistens ganz druff a wie alt die Person isch wo Alzheimer bekunnt.
Es isch kei Garantie aber je älter me isch wen mes bekunnt desto langsamer wird d Krankheit fortschritte... Das isch natürlich nur eini vo de wenige Faktore wo bi dere Krankheit mitspiele.

Wichtig isch eifach das d Patiente e guets und wohlbekannts Umfeld hend und me si lost lo mache was sie no im Stand sind z tue. Alzheimer isch wie die meiste neurologische Krankheite leider unheilbar aber me ka d Sympton eigentlich recht guet in Griff beko. Also zumindest in de Afangsstadie. Und d Krankheit het eigentlich 4 Stadie: 1. MCI = Mild Cognitive Impairment, und den die 3 Hauptstuefe wo uf dr obere Internet Site beschribe sind. Es git vo allne grosse Pharma Hersteller eigentlich e Medikation gege d Sympton. Ha selber uf dem Gebiet gschafft als Assistent. Was au no wichtig isch: Die Krankheit isch nid tödlich!!!

Ahjo was ich no ha welle sage: dass die Diagnose nid s Endi vo dr Welt isch. Die Vater wird no mängi schöni Stund ha.

mini Grossmuetter hett Alzheimer

Vorhär isch sie vereinsamt und depressiv gsi, ke Freud me am Läbe und alles hett ihre wee do. Denn hett sie e plötzlige Alzheimer-Schub bikoo und jetzt isch sii fröhlich, springt ume wie-n-e jungs Rehli und haltet s'Altersheim uff Trab. Aber klar, sie wird halt immer vergässlicher... Also für si isch d Krankheit, so blöds tönt, fascht irgendwie guet. Fürs Umfäld natürli weniger.

Übrigens muess ich em Intruder widerspräche: Alzheimer isch tödlig - wenns au lang goot: 10-15 Joor, usser es wird sehr frieh diagnoschtiziert, denn ev. länger. Nur mit 85-90 kasch au an vilem anderem als an Alzheimer stärbe

Allgemein loot sich übrigens fascht nüd sage: Es ka schnäll go, es kann aber au Joore bis zue de erschte wirklige Usfäll go...

Kenn au so en Fall. Has aber ziitlich etc. nid so beobachtet. Isch denn halt eifach mol so gsi und immer extremer worde. Bis er sini eigeni Familie nümme kennt wo an dr Tür isch go lüte.

Isch aber Johre gange.

Mein Beileid mal...

Also mi Grossmami liidet au an Alzheimer.. sie wird nächste Monet 88..
Bi ihre zeigt sich die Krankheit mol stärker, und denn mol wieder schwächer.
Mol will sie vom Altersheim use und Heim, zum em Grossvater go z'Mittag koche..oder denn verwäxlet sie mi mit minere Mueter..
Handskehrum chasch an eme Sunntig mit ihre zämme sitze und e super Jass klopfe..und sie leggt ei Match nach em andere ane.. Und Kopfrächne cha sie no immer wie e Wältmeischterin. Nur das mit em Karte in dr Hand hebe funzt nüm so rächt, wäg em Parkinson..

Isch bi ihre jede Tag chli anderscht.. mol weiss sie so guet wie nüd meh, oder het Hinrspinschtigi Idee.. und am nächste Tag isch sie voll normal, so wie sie friehner gsi isch..

kein problem, nur weil dein vati jetzt plemmplemm ist, geht die welt noch nicht unter. klar, alzheimer ist eine der schweren formen von demenz, aber wie oben schon erwähnt wurde, muss das nicht zwingend die stufe sein, in welcher er nicht mal mehr weiss, wer er selbst ist. abwarten... meistens findet das auch in stufen statt, was es meiner meinung nach für die angehörigen leichter macht, da es nicht von einem moment auf den anderen von 100 auf 0 geht.