the kaiser. hat geschrieben:für e topgoalie ka me ruhig e eu-platz opfere, aber denn muess är au wirklich guet sy.
dr gooli isch dr wichtigschti schpiiler von ere mannschaft.
e kahn zu syne glanzzyte, e cech oder buffon mache dr unterschiid us, do isch sälbscht dr holländisch nationagoali in d' wueschti gschiggt und für e transfer über 50 mio euro inveschtiert worde.
Naja bim momentane Kader gsehni ächt Schwarz dodefür. I mein mr hän jetzt scho 5 Nit-EU-Ussländer. Dodevo hän 2 e Stammplatz (Scotty und Eduardo) und 2 sin zumindescht heissi Awärter defür (Ba und Nakata). Bliebt no dr Mile wobii ich bi ihm au dr Meinig bi dass mr im Momänt ehner uff en verzichte chönnti (solang zumindescht wien'r nur im Mittelfäld spielt. Zum en als Stürmer z'beurteile spielt'r zwenig oft nochenand uff däre Position. I glaub aber är wär dört würgligg e gueti Wahl).
Das heisst theoretisch würds im Momänt grad uffgoh. Aber:
- welle vo däne Spieler verbannsch uff d'Tribüne?
- Do chunnt nächscht Joor no en Caicedo = 2 Spieler uff dr Tribüne (wenn dr Abbondanzieri chämti und 4-1 beschlosse würd)
Dass meh uss dr Sicht vo einige Fans durchus guet uff ei zwei Spieler verzichte chönnti (wenn meh so umeloost wäre das Mile, Nakata und/oder Eduardo, was übrigens nit mini Meinig widerspieglet), aber dr Punkt isch do dass mr uss dr Sicht vom Verein und speziell em Gross luege muess! Und do gsehts so uss:
Scotty, Eduardo und Ba wird dr Gross sicher nit uff d'Tribüne setze
Nakata isch e Spieler mit viel Potenzial und drum wird dr Gross ihn sicher ebefalls nit grundsätzlich uff d'Tribüne setze
Au wenn dr Mile bi vielne Fans nit so gliebt isch, gniesstr in de Auge vom Trainer doch e rächt hochs Asehe. Das chunnt vor allem au dodevoo will dr Mile sehr ambivalänt isetzbar isch und so dr ideali Luckefüller für en Trainer darstellt.
Dr Caicedo chönnt meh no am ehschte uss de 5 ufbotene Spieler striche, aber au ihm wird dr Gross Chancene gäh müesse.
(Theoretisch chunnt no en witere Spieler dezue, nämlich dr Kleber, wo offiziell nächschte Summer jo wieder zruggcho sött. Do ich aber genauso wie wohrschiins die meischte arg dra zwiifle hanen do gar nit berücksichtigt)
Schlussfolgerig:
Wenn 4-1 chunnt isch dr Verluscht fürs Team eh scho gross will uss de 6 Nit-EU-Spieler (bestehendi + Caicedo) immer mindeschtens eine uff d'Tribüne muess und eine nur uff d'Ersatzbank cha. Dr Verluscht wenn meh denn plötzlich 7 Nit-EU-Ussländer hätt wovoo eine dr Goali isch (=gsetzt) wär drum no viel grösser. Ich bezwiifle drum stark dass dr Gross dä Verluscht würd in Chauf näh.
Vorbehalt (zu minere Schlussfolgerig):
- Wenn dr Abbondanzieri in absehbarer Zyt e europäische Pass bichämti würd das d'Wohrschinlichkeit natürlich extrem erhöhe
- Sötti eine vo de Nit-EU-Ussländer uns im Summer verloh (Eduardo? Scotty und/oder Nakata nach ere starke WM?) würd das natürlich d'Situation entschärfe
- I gang eifach mol stark devoo uss dass en Abbondanzieri au s Nr 1 wär. Doch bim Gross wäri mr diesbezüglich nit sicher. Är hett schomol en nationalgoali uff dr Ersatzbank veruure loh... (wobii das no sinnloser wär, do denn au gar kei Nit-EU-Ussländer meh uff dr Ersatzbank Platz näh chönnti)
